'Webloug' n nij initiatief veur de Grunneger Toal
Moi,
Wie willen joe ook via dizze weg weer ais op de höchte stellen van n nij initiatief veur de Grunneger Toal: 'Webloug'. Veur aal dij organizoatsies en aander lu dij doar de slinger aan het, hebben wie van t Huis van de Groninger Cultuur n stee uutdokterd doar elkenain dij aan loop is mit evenementen, lezens, optredens, theoater en zo wieder in en rondom t Grunnegs zien berichtgevens en agendapunten kwiet kin.
Webloug op facebouk:
Dizze webstee staait ook in verbinden mit facebouk, woar ie ook bevrund mit worden kinnen. Wat t directe nijs aanbelangt en t sloagen doarvan hangt aalmoal van onze aigen inzet of. Elkenain dij denkt dat e over t Grunnegs wat te melden het, kin zuk op dizze facebouk-stee ook nog aans utern. Webloug op facebouk is bedould as n aalgemain forum veur en over Grunnen in t Grunnegs. Grunnegs is vandoag de dag nog n springleventege toal en is aalgedureg in bewegen. Hou t der bie joe aalmoal tougaait wilve geern van ale kaanten op dizze stee vernemen.
Ik zol zeggen loat joe nait nuigen en wees nait ainkenneg om hier of en tou n biedroage aan te levern.
n Forum van Grunnegers deur Grunnegers en ook nait-Grunnegers moutve hierbie nait vergeten. Veur elkenain dij n waarm haart veur Grunneger toal het, is der hier n stee om van gedachten te wizzeln. Ik wait dat der lu binnen dij wat kopschaauw binnen om wat van heur aigens heuren te loaten. Lu wees veuraal nait benaauwd om mit joen sproakwotter veur dokter te kommen. Loat joen toalgeremdhaid ais voaren. t Gaait ons echt nait om n vörm van puristisch toalverbetern, mor meer om t spul wat aan te joagen. Gain mins is volmoakt en vlekkeloos... in zien toal. Zuik t din veuraal in joen aigen beleven en richten en ie zellen maank joen oren joen pazzieve Grunneger toal vannijs ontdekken. Ie zellen din gaauwachteg maarken dat je veul meer waiten en denken dan je zulf ooit opbedocht haren. t Toalmesientje mout vanzulf wel deur joezulf opstart worden. Ie ontdekken din in joezulf dat je ook n lutje Columbus wezen kinnen, want riekdom van toal ligt zomor bie joe aan veurdeure. Baang wezen om wat verkeerds te zeggen of te schrieven moutve votdoalek ontzenen en toalvoutangels en klemmen loatve in dit forum veur wat t is. Ik zol zeggen 'aan t waark,' wie hebben t ja nog aan tied om der mit n kaander wat moois van te moaken. En kiek veuraal noar wat toukomst brengt, want wie hebben al veuls te veul weeromkeken noar wat west het. Blief bie de tied! en veur regelmoateg nijs uut ons Grunneger literair toaltoentje kinnen je boetendes ook nog terechde op webloug.blogspot.com
Henk Scholte, consulent Huis van de Groninger Cultuur