Home


home  >  verhaal   >  Verhoal oet De Laite

Verhoal oet De Laite [beschrijvingherinnering ]

Verhoal oet De Laite [1900-1930]

t Is nog nait zo laank leden da' k op verziede was bie ol Berend. Berend woont in De Laite, n streekje evenkes boeten Bennewolle. t Is n leeg legen stuk veenlaand, dat voak under wotter stond.

Dizze man ken zo schier over t streekje proaten, want vrouger waren der wel viefteg hoeshollens in De Laite. Nou stoan der nog gain twinteg hoeskes meer, en binnen der mor n poar Laitjeders. De hoeskes binnen aal overnomen deur "Westerlingen", mor schiere verhoalen binnen der gelokkeg nog wel.

Ik mag geern evenkes in d'olle kroakstoule van Berend zitten, n overbliefsel van n raitenvlechter oet Noordwolle, en aan d'olle keukentoafel mit swilk. Op swilk legt kraante en stoan kopkes en n pruttelende kovviepot. Zo bin je soms evenkes weerom in dij tied. Je kieken noar boeten, woar nou bos aanpoot is, mor woar vrouger haidevelden mit jeneverstroeken stonden.

De aarbaiders hadden t vrouger nait makkelk om aan waark te kommen. Veul lu waarkten in Duutslaand, dat was ja kort bie, want n schaiden was der sikkom nait. s' Winters was der nait veul te verdainen en gingen Laitjeders smokkeln. Mainstied hoalde man klontjes, suker en foezel (n soort braandewien) oet Duutslaand. Dat wer in achterlaand verpatst, ook in kontrainen van Winschoot.

_
Auteur: H. Korte
_