“Holwinde”, ien t grunnegers “Holwien”, op dij plek sleet ik mien kienderjoaren. n Historische plek, woar ik eerst even wat over vertellen goa.
n Buurtschop, woarvan t grootste dail heurde tot kerspel Oskwerd en t lutjeste dail tot Oethoezen. Grens volgde wotterloop vanoet Holwienster moar ien noordleke richten, laans wier van Oldörp.
Eerst was t n edele heerd, dij ien 17e aaiw ploatsmoaken mos veur borg “Holwinde”. t Wer bewoond deur n fraize jonker, dij bekendhaid kreeg deur zien steun aan rondtrekkende R.K. missionoarissen en heur onnerdak verschafte. Resten van tufstainen kapel binnen nog vonnen ien 19e en 20e aaiw.
Twaide helft van 18e aaiw verrees der nije boerderij. Op dij plek heb ik woond van 1935 tot 1941, dou op 28 december deur n vlaigtuuggevecht braandbommen deel villen en haile boudel oafbraande.
t Was n olle “kop-en haals” mit graacht der rondom tou en doar omhèn weer n singel mit bomen; veur t hoes n grode toen. Op ain kaant bie schuur laans ston n rieg kestaanjebomen en ien toen appel-en perenbomen van olle grunneger rassen. Ien graacht gruide kalmoeswoddel, swoanebloumen en gele lis. Der zatten n bult kikkers ien graacht dij mie bie zummerdaag te sloap oet hillen mit heur gekwaak.
Veur t hoes haarve n regenbak,woar je mit n regenbaksemmerke aan n ket wotter ophoalen mozzen. Noast boven-end ston n stookhut, begruid mit klimop, n kookpot der ien, dij mit schinzen stookt wer. t Wer bruukt mit grode was en swienslachten. Aan graachtskaant haarve n bounpost, woar melkgoud hemmelt wer en kwam den op kop op emmerrik om te dreugen, net as potten en pannen, want dij waren swaart aan boetenkaant omdat kookkaggel stookt wer mit holt.
Op aanderkaant van ploats was t hounderhok mit boetenloop (scharrelhounder dus), mien knienenhokken stonnen doar ook. Wie hemmen n zet laang zo n kwoie hoan had, dij doadlek op mie oafkwam as ik knienen vouern mos, k duurde deurke van t hok hoast nait opendoun zo baang was k veur dat baist. Knienen kregen dizzel en hooi te vreten en bie winterdaag wat hoaver en vouerbait.
Op zied bie schuur har k sik. s Winters stonden knienen en sik op staal onner op achterdeel. Noa schoultied was k der drok mit en mog ook geern mien Pa helpen mit kaalver vouern. Sums har k wel ais zaailam aan vles, dij was den echt van miezulf.
Oogsttied was allermooiste tied, op lege woagen mit noar t laand en omraais bovenop volle vouer noar hoes. As k doar nog weer aan denk, roek k koren en peerdeswait. Mit schafttied kreeg k ook altied n spoulkom vol kovvie, wat k nait geern lustte mor k mos ja mitdoun. As t mennen veur dij daag doan was, mog k peerden ien t laand brengen. Emma en Roza, belgpeerden mit van dij dikke konten en n kort stattje. Pa tilde mie op ain van baiden en d aander aan toom der noast.
Wat heb k mooie kiendertied had! Laifde veur daaier en netuur is nooit veurbie goan. Noa opbouw van boerderij is der n bult veraanderd, mor dij plek, dat olle “Holwien” is veur mie nog aaltied hail bezunder.
