Ain joar noa d echte Woatersnoodramp in 1953 beleefden wie ain aigen mini-woatersnood! Veurjoar 1954 betrokken wie n nuver klain benedenwoninkje in Oranjewiek in Stad omdat moeke gain trap lopen meer kon. t Was nait slim groot, ain veurkoamer, ain achterkoamer en ain klain sloapkoamertje en n lutje keuken. Moar toch ook n klain toentje veur- en achterthoes. En n fietsenschuurtje vanzulf.
Pa haisterde haile zummer laang zewat elke oavend en elk weekend om alles moar netjes en schier te moaken. Vaarven, behangen, witten (witkalk met zakje blaauw der deur) etc. Dou alles net goud en wel in de vaarf zat en de rest ook op stee was kregen wie in oktober nije bovenburen. Dat was n gezin met zes kinder in leeftied van vief tot vieftien joar. Ze kwammen oet n klain dörp in Drenthe omdat de voader n boan in Stad annomen haar.
Dat hebben wie waiten! ‘Dèèèrk !’ blerde mien moe op zoaterdagmiddag ‘kom gauw ains kieken mien jong, haile keuken staait blank’. Pa der hen vanzulf en wos nait wat hai zag. Haile muur dreef, dikke graauwe strepen der op, witkalk van plefond was broen en geutstain ston vol woater. Wat n ramp! Hou was dat meugelk? Dudelk was wel dat t van boven kwam, dus pa doar moar votdoadelk anbelt. Buurvraauw vroug wat der was en pa zee dat onze haile keuken vol woater ston en of zai boven meschain aargens lekkerij haar. ‘Ach jee’, zee buurvraauw, ‘das ja ook wat. Oes wichterties hebben alweer kroantie open laten stoan, Ze bent der ja nog steeds verwonderliekt over dat der zomoar water oet muure kumpt en dat je hier gain ‘gewone’ pompe hebben’. Heur aigenste nije kokosmadde dreef ook al weer tot gang oet. ‘Ie worren bedankt’ zee pa, ‘haile zummer heb k knoeit en doan om boudel schier te kriegen en nou ken ik nog ais weer van veuren of aan begunnen’.
Gelukkig was hai wel zo wies om nait vot weer te begunnen, want nog twijmoal dat joar stroomde onze keuken vol, veurdat ‘de Drenties’ het deur haren dat je kroan ook altied weer dichtdraaien mouten as je hom broekt hebben. Wie hebben doarnoa gelukkig toch nog twoalf joar lang guie buren an ze had, en dat zunder woateroverlast.
